Heb 6 | PONPDN | STEP | Ime kitail pan muei san tapin padak en Kristus, ap kakairi da o unsokela, a kaidin pur on wia pason ni at kalukila wiawia en mela kan, de poson Kot,

Hebrews 6

1 Ime kitail pan muei san tapin padak en Kristus, ap kakairi da o unsokela, a kaidin pur on wia pason ni at kalukila wiawia en mela kan, de poson Kot, 2 De padak duen paptais, o pokada pa kan poa, o duen en me melar akan ar pan maureda, o duen kadeik soutuk. 3 A i me kitail pan wiada, ma Kot pan kotin mueid on. 4 Pwe a so kak pa ’rail, me marainlar, o me wewekier kisakis san lan, o audaudkier Nen saraui, 5 O lolekon kilar masan en Kot mau, o manaman en muei mau kokodo, 6 Ma irail pan pup wei san, re solar pan kak pur on kalula, pwe irail pein kalopuela Sapwilim en Kot o kanamenokalar i. 7 Pwe sap me lamelamur ki katau, me kin purepure moredi on, o me kawosadan irail, me kin wia sapasap kapwa mau, iei sap o me kin ale pai ren Kot. 8 A ma a kin kawosada tuka teketek o dip, iei me sued o mau on kariala o ni imwi a pan karon ala. 9 A kompoke pat akan, so asa, me komail sota kin duota ni meakan me kareda maur, ari so, iduen at kin padapadak. 10 Pwe Kot sota sapun, o a sota kak maliela omail wiawia kan o omail dodok limpok, me komail kasansale on mar a ni omail papaer me saraui kan, o ni omail kin papa. 11 A kit kin inon ion, amen amen komail en nantion duedueta kasansaleda kaporopor melel lao lel imwi. 12 Pwe komail der tananala, a komail alale san irail, me poson o kanonama ap sosoki inau kan. 13 Pwe ni en Kot a kotin inauki on Apraam, a kotin kaukila pein i, pwe sota me lap san en kau kila, 14 Masani: Melel I pan kapai uk ala o kaneder uk ala. 15 I ari auiauieta ni kanonama ap pwaida inau o. 16 Pwe aramas akan kin kaukila me lapa san ir, o kaula kin kaimwisokala akamai karos. 17 I me Kot pil kotin kaukila, pwen kasale on irail, me pan sosoki pai en a inau o, me a inau sota kak wukila. 18 Pwe son riau me so kak wuk, pwe Kot sota kak likam, en kamait kit ala melel, pwe kitail en tan won kaporopor, me mi mo atail. 19 Kaporopor wet me ras on paipon en nen atail, me melel o ten, me kak lel won nan pera saraui. 20 lel wasa atail saunkair kotila ia pweki kitail, Iesus, me wiala samero lapalap ni al en Melkisedek kokolata.